A Xunta Directiva saínte da Asociación Veciñal Río Sarela, a dereita, e membros no equipo entrante durante a Asemblea do 4 de novembro

Jon Brokenbrow, inglés de Bristol que leva un cuarto de século vivindo en Santiago, é o novo presidente da Asociación Veciñal Río Sarela, un cargo que asumiu o pasado venres con “moita honra” e coa intención de “dinamizar o barrio de San Lourenzo e Carme de Abaixo, escoitar aos veciños e involucrar a todos os sectores e xeracións na mellora da nosa contorna e da cidade”.

A Xunta Directiva da Asociación Río Sarela, fundada en 1977, foi votada por unanimidade na asemblea extraordinaria celebrada o pasado sábado. No equipo que preside Brokenbrow figura xente con moita experiencia no movemento veciñal, como Fernando Peleteiro (vicepresidente actual e antigo presidente do colectivo), Ángel Lado (secretario e vicepresidente con Peleteiro) ou Alfonso Castelao. Xunto a eles completan a nova directiva Juan Martínez (tesoureiro), María Torre, Ángel Carreira, Álvaro García e Vicente Mandado como vogais.

Tradutor de libros infantís e periodista, Jon Brokenbrow leva case tres décadas vivindo en España. Os últimos 25 anos na Carballeira de San Lourenzo, diante do local social do colectivo veciñal. Ilusionado co apoio que lle amosaron os veciños, o novo presidente asume o cargo “cunha visión clara do obxectivo que queremos acadar, escoitar as persoas que viven no barrio para axudar a resolver os problemas que nos afectan a todos e mellorar a súa calidade de vida, sen esquecernos de atraer ás novas xeracións que chegan ao barrio”.

Coa intención de coñecer de primeira man as peticións dos habitantes de San Lourenzo e Carme de Abaixo, a nova directiva convocará próximamente unha asemblea na que “queremos concretar as primeiras actuacións que imos levar a cabo”. Mentres, e para facilitar a comunicación coa veciñanza, contamos con esta web que estás lendo (www.riosarela.org) e unha páxina de Facebook (@riosarela).

Parte dos veciños do barrio de San Lourenzo que asistiron á Asemblea da Asociación Río Sarela o 4 de novembro